حوار مع روح بوسبوس

حوار مع روح بوسبوس

1) تحبى تعرفى نفسك ازاى ؟

هقولك نفس التعريف اللى كتباه عنى فى مدونتى وفى أى مكان تانى اللى هو واحدة عادية ممكن أكون مختلفة شوية يعنى جوايا متناقضات كتير بس كمان جوايا أفكار كتير, طموحة جدااا وأجتماعية جداااا وبحب الحياه والناس وعندى آحلام كتير نفسى أحققها , ونفسى الناس تكون ناس , بحب الكتابة جدا بحس أنها أنا مبقتش أقدر أعيش من غيرها وأهم حاجة أنها تأثر فى الناس وتعمل حاجة بجد ماتكونش مجرد كتابات موجودة وخلاص ساعتها هحس أنى عملت حاجة بجد

2)من امتى بداتى الكتابة ؟

هو أنا من زمان لما كنت فى ثانوى وكلية كنت كل فترة بمسك الورقة والقلم وأكتب خواطر أو قصص أو أى موقف مر بيا ولكنها كانت ليا وفيه و منهم كان مصيرة أنه أتقطع وأترمى ولكن كتابة فى المجلات من سنه 2007 لحد دلوقتى

3) فى بداية طريقك ايه المشاكل اللى قابلتك ؟

المشاكل موجودة من البداية ولحد دلوقتى يعنى فى البداية من أول ما بدأت أستخدم النت وكان فيه أعتراض أصلا ومشاكل على قعادى على النت فترات طويلة وطبعا فى البداية أنا ماكنتش لسة عملت مدونتى ولا كتبت فى مجلات لأنى كنت لسة بستكشف العالم ده وحتى بعد ما عملت مدونتى ماكانش حد يعرف حاجة عنها وماحدش عرف الا بعد ما عملت مدونة البنات عايزة إيه وطلعت فى برنامج فى الراديو ساعتها سمعتهم فى البيت الحلقة وفرحوا بيها جدا جدا ولكن كان برضة فيه مشكلة بالنسبة للمجلات فى البداية محدش كان متقبل اوفاهم أزاى أكتب بأسمى الحقيقى على مجلة على النت او احط صورتى فيها بالأضافة الى مشاكل التواصل مع فريق عمل المجلات من أجتماعات فى الواقع او التليفون كان لسة الموضوع مش محبب فى البيت عندى ومش مقبول وخدت فترة كبيرة لحد ما أقتنعوا بيها والحمد لله الموضوع من فترة وهو بقى عادى يعنى موضوع أنى بكتب فى مدونات مجلات جرايد بقى عادى

أسمى وصورتى يتنشروا أعمل كتاب عادى

بس برضة وعلى فكرة أى بنت فى مجتمعنا ده فى الخروج وحضور الأجتماعات والسفر وعدم تقبل ناس كتيرة فى المجتمع حواليها للموضوع ده وممكن يكون أهلها موافقين لكن للأسف باقى الناس والمجتمع مش عاجبهم يعنى أيه واحدة تكتب فى مجلات وجرايد وتعمل كتاب ولا تفكر تعمل كتاب تانى وتسافر وتروح وتيجى وتحضر أجتماعات المفروض تشوف أى حاجة قريبة تشتغلها وخلاص أو بلاش تشتغل والمفروض نشوف لها عريس ده تفكير المجتمع ككل وأحنا عايشين فيه وهنفضل نعانى من كل التفكير ده

4)الكتابة بالنسبة لك مهارة ولا موهبة ؟

لا موهبة الحمدلله وده كان فى البداية وبعدها بدأت أكتسب مهارات من ناس كتيرة قوى حواليا وده خلى الموهبه عندى أحلى بكتير من الأول يعنى لو شفتى أى حاجة كتبتها من سنتين ثلاثة وحاجة كتبتها الأيام دى هتشوفى الفرق وتفهمى كلامى

5) iايه العلاقة اللى بين بسمة والكتابة

تقدرى تقولى أنها بقت واحد أنا ما بقتش أقدر أعيش من غير كتابة حتى لو كانت عبارة عن فضفضة أو كتابة موقف مر بيا بصراحة بقيت مدمنة للكتابة ومش متصورة أنه هايجى يوم وهبطل حتى لو بطلت شغلى فى المجلات لأى ظروف مدونتى هتفضل موجودة أكمل فيها كتابة

مش عارفة بصراحة حاسة أنى بقيت هيا وهيا بقت أنا

[fازاى جات فكرة كتاب البنات عايزة ايه ؟

الفكرة بدأت بدردشة بينى وبين أتنين بنات مدونات على الميل وكنا بنتكلم عن مشاكل كتيرة عندنا وساعتها حسيت أن كل مشاكلنا أو معظمها سببها عدم فهم المجتمع ككل لينا وأقترحت عليهم نعمل المدونة ونتكلم فيها عن نفسنا وعن أى حاجة محتاجينها من المجتمع ووافقوا وعملتها وبعدها بفترة بدرية أشتركت معانا وأنا وهيا اللى فضلنا مستمرين فى المدونة ولما لاقينا ردود فعل كويسة على المدونة فكرنا فى تحويلها لكتاب ومشينا فى الخطوات وعملنا الكتاب

بتخافى يجى يوم وتبقى مش قادرة تكتبى اى حاجة ؟

اه بخاف لأن الكتابة عندى مش مجرد شغل فى مجلات ولا جرايد ولا مجرد كتاب بعمله أنا أكتر شىء بيسعدنى فى الكتابة أنى بقدر أطلع اللى جوايا وأفضفض من خلال الكتابة بأى صورة ويمكن مش المواقف اللى بمر بيها بس اللى بكتبها يمكن أى حاجة بشوفها أو بلاحظها حواليا فى المجتمع تشدنى وأكتب عنها وخوفى ده نابع من أنى كتومة قوى وما بتكلمش كتير مع أى حد ومش سهل ابدا أى حد يعرف اللى جوايا لو أنا مش عايزة أتكلم وعلشان كده لازم أكتب علشان أطلع اللى جوايا بأى صورة

لما مش بتلاقى حاجة تكتبيها بتعملى ايه ؟

بفضل الف فى مدونتى واقرا فى الحاجات القديمة اللى عندى وبلف فى مدونات كتيرة وأفضل اقرا فيها وساعات بفتح التليفزيون أشوف أى برنامج أو مسلسل أو فيلم علشان أجيب أى أفكار أكتبها لان الكتابة بقت أدمان عندى ولما ما بيكونش عندى أى فكرة بحاول أجيب أى فكرة بأى طريقة

بعد ما دخلتى عالم الكتابة اصحابك اتغيروا ولا بقوا زى ما هما ؟

أصحابى اللى كانوا قبل الكتابة لسة موجودين عادى زى ما هما ولكنهم ما يعرفوش أى حاجة عن أنى بكتب أو الكلام ده ولكن أنا برضة صاحبت ناس كتيرة جدا بعد دخولى عالم المدونات والمجلات وبعتز بيهم جدا تقدرى تقولى أنا عندى أصحاب من كل شكل ولون أصحاب زمااااااااااااااان ومعاهم ذكريات الدراسة والمدرسة والجامعة وأصحاب دلوقتى اللى تفكيرهم وأتجاهاتهم الفكرية متقاربة جدا معايا

لو هتختارى حد من الكتاب الكبار تكونى زيه هتختارى مين ؟

مش هقدر أختار حد لأنى مش هعرف أكون غير نفسى ولأنى أصلا مش شايفة نفسى كاتبة بالمعنى المعروف علشان أقارن نفسى بيهم أو أقول أنا نفسى أبقى زى فلان أو فلان

ايه اكتر حاجة بتحبيها ؟

بحب تكوين علاقات أنسانية كتير قوى وأنها تكون علاقات ناجحة وبحب دايما اللمه وسط الأهل والأصحاب وكل الناس ويمكن هتحسى بتناقض فى كلامى لانى بطبعى شخصية خجولة ولكنى برضة أجتماعية جدا

ايه اكتر اسم ولد واسم بنت بتحبيه ؟

بالنسبة للولاد هو مش أسم واحد هما ثلاث أسماء ومش هقدر أقول أسم واحد هقول الثلاثة أولا أسم أحمد لأنى كان ليا أخ تؤأم أسمه أحمد ومات والأسم ده عزيز عليا جدا وكمان أسماء أخواتى الأتنين تامر ومحمد بالنسبة للبنات بحب أسم حنين قوى

مين الشخص اللى مش بترفضى له طلب ؟

أخويا الكبير مهما طلب منى مش هقدر أرفض له طلب مهما كان لأنه مش مجرد أخ ده أخويا وصاحبى وأبويا وحبيبى وكل حياتى ولولاه بجد ماكنتش بقيت كده واللى عمله طول حياته علشانى واللى لسة بيعمله كتير قوى ومهما عملت مش هقدر أوفيه حقه أصلا

بتحكمى على الناس ازاى ؟

هو أكيد التعامل بيبين الناس على حقيقتها ولكن أنا عندى شىء بيحصل جوايا من قبل حتى ما أتعامل مع أى حد بيخلينى أحس أذا كان الشخص ده كويس ولا لا سبحان الله أحساسى بيدلنى وغالبا فى معظم الوقت بيطلع أحساسى صح وبعد التعامل بعرف أن اللى كنت حساه صح وبعدين التعامل والمواقف الحياتية المختلفة

كفيلة أنها تخلينى أحكم على الناس

نفسك تعيشى كام سنة ؟

لا تعليق ههههههههههههههه

مين مغنيكى المفضل ؟

عبدالحليم حافظ فيروز نجاه عايدة الأيوبى أصالة أنغام محمد فؤاد محمد منير وغيرهم كتير على حسب الأغنية بقى

اذا دخلتى موضوع ومعجبكيش ممكن تجاملى صاحب الموضوع وتكتبى اى حاجة عشان ميزعلش ولا هتعملى ايه ؟

طبعا الموضوع ده ما فيهوش مجاملات يعنى لو الموضوع مش عاجبنى مش هعلق لو عندى نصيحة ممكن اقولها ولكن مش هعلق لمجرد المجاملة

ايه مدى ارتباطك بالمدونة والفيس بوك خصوصا والنت عموما ؟

المدونة دى بعتبرها أنا مرتبطة بيها جدا زى ما تكون بنتى أو حته منى والفيس بوك أرتباطى بيه علشان شغلى مش أكتر ومقدرش أنكر أنى عرفت منه ناس كويسة وفى نفس الوقت قابلت ناس مش كويسة ومريضة جدا النت عموما بقى مهم جدا عندى

بتخافى من الوحدة ؟

اه جدا وبقيت بكرهها وبحاول أتخلص من أحساسى بيها وأخرج منه بأى طريقة

مين الشخص اللى نفسك تشوفيه دلوقتى ؟

هو برضة مش شخص واحد هو كذا حد أخواتى الأتنين لأنهم وحشونى جداااااااااااااااااااااا وعمى الله يرحمه نفسى بجد أشوفه قوووووووى وحشنى جدا جدا وناس تانية كمان بقى

تقولى لمين " وحشتنى " ؟

لأخواتى ولعمى الله يرحمه ولناس تانية برضة

لو معاك اله الزمن تروحى لسنة كام وتحبى تشوفى مين ؟

بصى هرجع لورا خمس سنين وأشوف عمى الله يرحمه وهمشى لمده سنه أو سنه ونص علشان هيكون أخواتى فى أجازة هنا وهشوفهم وكمان همشى كام سنه كده أشوف نفسى ساعتها أرتبطت بحد أنا فعلا كنت عايزاه وبتمناه وحصل ايه فى حياتى بقى

مين الشخصية اللى بتتمنى تكون زيها ؟

أتمنى أكون نفسى أفضل زى ما أنا كده البنت العادية البسيطة عايزة أكون نفسى وبس

لو حد قالك " بحبك " هتقولى له ايه ؟

ده يتوقف هو عايز إيه بعد ما قالها يعنى قالى بحبك وسكت ومستنى أقول له أنا كمان بحبك ونفضل نحب فى بعض كام شهر ولا كام سنه من ورا أهلنا وبعدها يفكر يجى يخطبنى ولا لا ، ولا هو قالها علشان يعرف هل أنا موافقة على الأرتباط بيه وموافقة عليه ككل وعلى ظروفة علشان ابلغها لأهلى وبعدها يتفضل يخطبنى ،

لو قالها بهدف الحب وبس ونمشى مع بعض من ورا أهلنا والناس ممكن أقتله ساعتها لأنى مش هعمل كده حتى لو روحى فيه ولكن لو كان عايز يعرفنى ظروفة ويعرف أنا موافقة عليه ولا لا وأمهد له الطريق مع أهلى علشان يتقدم مفيش أى مشكلة

نفسك تقولى حاجة ؟

نفسى ناس كتيرة تفهمنى صح وتعرفنى كويس تعرفنى من جوايا لأنى كتير مش بطلع اللى جوايا ومحدش بيعرفه ولا يحسه ولكن لما الناس بتفهمنى صح بيعرفوا أنا جوايا أيه

تقولى ايه لشخص ظلمك ؟

ربنا يسامحك وبحتسب أى ظلم وأى حاجة حصلت ليا فى حياتى عند ربنا وهو قادر يعوضنى خير ويجازينى على صبرى وعدم رد الظلم بالظلم

ايه احلى صفة فيكى ؟

هو تقريبا محدش يقدر يقول أحلى حاجة فيه ايه ولكن على ما أعتقد خجلى يعنى بحس أن الخجل والحياء صفة أساسية فى أى بنت

ايه رايك فى الحوار ؟

راااااااااااااااااااااااااااااااائع وماكنتش متوقعاه أصلا أنتى بجد موهوبة جداااااااااااااااااااااااا وهيكون ليكى إن شاء الله مستقبل جميل قووووووووووووووووووووووى أستمرى